伊拉两介头 舞台又碰头(图)

马哥

2011-02-27 14:33:56 来源: 新民晚报(上海)



文 / 邵永平

提起张行迭个名字，上海滩浪向交关人侪晓得伊个。特别是中年人第一反应是上世纪80年代就红遍全中国个吉他弹唱歌王，而年轻人则是辣辣央视个《同一首歌》当中经常看到伊。

埃个红歌满天飞个辰光，迭位辣辣上海土生土长个山东人开了中国流行音乐个先河，从顶顶草根个弄堂邻居“斩歌”（比歌声）到区级模子“敲琴”（比吉他）；最后大胆个拿台湾刘文正个歌曲改良后搬上上海舞台，并赢得上海青年吉他歌手大奖赛桂冠。一时浪向，马路高头个录音机时勿时会得播放《一条路》、《多少次歌唱》、《寂寞的小男孩》等妇孺皆知个歌曲。

“北飘”28年个张行迭趟怀着感恩之情回到上海大舞台，由市慈善基金会牵头成功举办了个人演唱会。本来设想与海派清口创始人周立波同台“白相”怀旧金曲，辣调侃通俗歌曲变迁过程当中买买关子、摆摆噱头。勿巧波波个档期排得拍拍满，后来再晓得迭桩事体波波老老遗憾：“阿拉两家头是1981年一道考上海曲艺剧团学馆个辰光认得个，结果我考取了，张行坚持到最后一轮拨辣刷脱了，后来伊辣陌生头用吉他弹唱一炮打响，验证了伊当时个一首歌曲《成功的路不止一条》，如果我早一点晓得张兄有意请我做一个演唱嘉宾，我是再忙随便哪能也要抽出辰光捧捧场，再讲阿拉两介头曾经侪有过相同个经历搭仔坎坷，通过阿拉两介头舞台浪向重新碰头，可以告诉后人，成功是需要坚定搭耐力个！”


事体也呒没介巧个，年初四个夜里，张行夫妇辣辣旅美歌星杭晨个陪同下头，来到长宁国际体操中心，观看周立波个最新力作《民生大盘点》，张行是笑得前仰后翻，笑得眼泪水也出来了，伊外加边看边夸：“波波个表演无论题材选择还是控场能力侪已经达到炉火纯青个境界，值得阿拉歌唱演员借鉴。”当演出进行到半场高潮辰光，波波拨辣所有个观众带来了一个惊喜：“今朝上海个歌星张行也坐辣下底头，阿拉欢迎伊上台唱一只好？这档节目是奉送个，合（gek）算噢！”只看到张行风度翩翩个登上舞台搭长长远远呒没见面个波波来了一个热烈拥抱，随即搭观众互动起当年成名作《迟到》。波波个即兴二声部衬底拿演出又推向一个高潮。波波第二天还辣屋里向摆圆台面款待“失散”多年个张行，感谢迭位兄长个难忘捧场。

沪语小辞典

【时勿时】 不时地

【迭趟】 这次

【拍拍满】 非常满

【介巧个】 这么巧的

作者：邵永平 (本文来源：新民晚报 )